CEBU, Philippines — Patay diha-diha dayon ang usa ka 11-anyos nga menor de edad nga lalake human nalatayan ang ulo niini sa trak nga naka side sweep sa motorsiklong giangkasan sa biktima ngagimaneho sa iyang amahan diha sa National Road, Barangay Jubay, Lungsod sa Liloan kagahapon sa buntag, Biyernes, Abril 12, 2024.
Ang motorsiklo gimaneho ni Rogelio Dungog Jr., 53 anyos, residente sa Bonifacio Street Poblacion, Dakbayan sa Lapu-Lapu ug angkas niya ang iyahang anak nga 11 anyos nga maoy nakalas.
Samtang ang dumptruck gimaneho ni Lemuel Capacity Mojillo, 45 anyos, nagpuyo sa Lawaan II, Talisay City.
Nagkanayon si Police Major Eric Gingoyon, hepe sa Liloan Police Station ang motorsiklo ug truck pareho nga gasubay sa lane paingon sa norte nga direksyon.
Sa pakighinabi nila sa driver sa truck kini miingon nga naay LPG delivery truck sa iyahang atubangan maong nimaniobra kini patuo sa outer lane.
Wala kini nakabantay sa motor sa manag-amahan maong naigo niya kini ug natumba ug nalatayan ang ulo sa 11 anyos nga bata.
Ang amahan nga maoy nag drive sa motorsiklo naa sa tambalanan sa dakbayan sa Lapu-Lapu tungod sa naangkong kadaut sa kalawasan.
Sutaon pa sa kapulisan sa Lungsod sa Liloan kung asa padulong ang mag-amahan. Gikustodiya karon sa ang driver sa truck nga posibleng mag-atubang og kasong Reckless Imprudence Resulting to Homicide, Physical injury and Damage to Property. IBM BANAT NEWS