Alcover nakurat sa mando nga ibalhin ang opisina sa OSCA

CEBU, Philippines — Ang Chairman sa Senior Citizen Council sa dakbayan sa Sugbo niangkon nga nasurpresa sila sa memorandum nga giluwatan sa buhatan sa mayor nga nagmando sa Office of the Senior Citizen Affairs (OSCA) nga mobalhin gikan sa kasamtangang buhatan.

Si Konsehal Pastor  Jun  Alcover, Chairman sa Committee of Senior Citizens sa Cebu City Council niangkon nga nasurpresa siya pagkakita sa memorandum nga gipirmahan ni Cebu City Mayor Michael Rama.

Ang maong memo gi adress ngadto kang Attorney, Homer Cabaral, Johnson Hontanosa, ug Juliefe Cuenca, ang kadagkoan sa OSCA. Matud ni Alcover, gitawagan siya ni Cabaral dihang nadawat mismo ang memo.

Nangutana sya nako kung unsa, niingon ko nga wala ko kabalo ana kay sya mismo wala man sad siya istoryahi,  matud ni Alcover.

Dugang pa niya nga sa pagbasa sa memo, naglibog sila sa unod niini ug nag-ingon nga "nasakitan" sila sa direktiba tungod kay ang OSCA under sa Office of the Mayor.

Matud sa konsehal nga mas maayo unta nga tawgon sila sa wala pa sila maisyuhan sa memo. Ang memo gi-isyu niadtong Abril 2, 2024, nga nagmando sa OSCA nga bakantehan and buhatan nga nahimutang sa ground floor sa ABC building.

Nasuwat sab sa memo nga ang maong mando nagumikan sa hangyo sa City Treasurer's Office nga gamiton ang OSCA Office.

Nasayran nga ang buhatan sa OSCA ibalhin ngadto sa ikaduhang andana sa satellite office duol sa Metro Cebu Water District (MCWD) building.

Plus kanang opisinaha dira, wala pa gyuy CR..mao nga nakurat kaayo ko kay immediate man, mura mag dinalian,  suma ni Alcover.

Subay niini, si Alcover niingon nga moduso siya og resolusyon pinaagi sa privilege speech aron pag-apelar sa ilang kahimtang ngadto sa mayor aron tukion pag-usab ang desisyon. (BANAT NEWS)