Upat patay sa disgrasya sa motorsiklo sa Sta. Catalina, Negros Oriental

CEBU, Philippines — Upat ang patay sa aksidente sa kadalanan sa sitio Bliss, Barangay Poblacion, Lungsod sa Sta. Catalina, Probinsiya sa Negros Oriental niadtong Dominggo sa gabii, Marso 24, 2024.

Pulos nagmotorsiklo ang nalambigit sa disgrasya diin ang usa sakay ang pamilya ug ang amahan nga 32-anyos maoy nag drive ug angkas ang iyang asawa ug duha ka anak nga edad 2 anyos ug 7 anyos.

Samtang ang laing motorsiklo gi-maneho sa 42-anyos nga lalake nga taga Barangay Nagbo-alao, Lungsod sa Basay. Matud ni Patrolman Ivan Hoe Dales, imbestigador sa Sta. Catalina Police Station nga ang 42-anyos nga driver nga gikan sa Sta. Catalina ug padulong sa Basay ni-overtake sa motorsiklo.

Apan sa iyang pag overtake nikawat kini sa lane sa laing motorsiklo nga gisakyan sa magpamilya ug iyaha kining nabanggaan.

Ang pamilya nga sakay sa motorsiklo, gumikan sa kakusog sa impact namatay ang amahan, inahan ug ang 7 anyos nila nga anak samtang naka survive sa hitabo ang 2 anyos nga bata.

Patay sab sa maong hitabo ang 42-anyos nga lalake nga hinungdan sa disgrasya.

"Sa among pagsusi didto sa hitaboan as per sa naka rescue baho gyud og ilimnon ang katong driver nga padong sa Basay", sigon ni Patrolman Dales.

Samtang nalandig sa tambalanan ang usa ka drayber sa SUV human siya nabangga sa poste diha sa karsada sa Cebu South Coastal Road (CSCR) habig sa Barangay Tanke, Dakbayan sa Talisay kagahapon sa kadlawon.

Ang mga sakop sa City of Talisay-Traffic Operation Development Authority (CT-TODA) dali nga miresponde ug gidala sa tambalanan ang drayber nga gihulagway nga nakainum og ilimnong makahubog.

Ilang gibasehan ang baho sa drayber nga ilang gihaw-as sa sakyanan.

Niadtong miaging adlaw usa ka SUV ug mixer truck ang nagbangga sab sa mao gihapon nga lugar.  Gabriel C. Bonjoc (BANAT NEWS)