CEBU, Philippines — Usa ka pribadong kompaniya ang miduso og proposal ngadto sa Provincial Economic Enterprise Council (EEC) nga sila ang magpatukod sa integrated multi-modal bus ug ferry terminal sa siyudad sa Talisay dapit sa South Road Properties (SRP).
Si Johnny Ng, ang presidente ug CEO sa Cebu South Harbor and Container Terminal Services Corp. (CSHCTC) nisalmot sa tigom nga gihimo sa EEC niadtong Marso 22 diin iyang gipresentar ang iyang plano.
Ang proposal ni Ng nahisubay sa plano sa Kapitolyo nga maluagan ang dagan sa trapiko sa dakbayan sa Sugbo pinaagi sa pagbalhin sa bus terminal sa Probinsya ngadto sa SRP ug iipon sa ferry terminal.
Si Gobernador Gwendolyn Garcia nga maoy pangulo sa EEC mihangop sa plano ni Ng ug niawhag sa negosyante nga mosumiter og unsolicited proposal aron mareview sa EEC.
Ang CSHCTSC, usa ka kompaniya nga gipanag-iya sa Pinoy nga magtukod og mga international cargo port sa dakbayan sa Talisay. (BANAT NEWS)