6.5 million ka tawo ang rehistrado na sa PhilSys sa Central Visayas

CEBU, Philippines — Niabot ngadto sa 6.5 million ka mga indibidwal sa Central Visayas ang narehistro alang sa Philippine Identification System (PhilSys) sa niaging tuig 2023.

Sa pinakauwahi nga datos nga nakuha sa Philippine Statistics Authority Regional Statistical Services Office VII (PSA RSSO VII) niadtong Disyembre 31, 2023 adunay 6,521,136 Filipinos sa Central Visayas ang PhilSys-registered.

Nag-una ang Cebu nga adunay 4,140,045 nga nagparehistro, gisundan sa Negros Oriental nga adunay 1, 150,746, samtang ang Bohol adunay 1,139,677, ug ang Siquijor adunay 90,668.

Ang PSA RSSO VII nakab-ot ang usa ka mahinungdanong milestone tungod sa dakong datos nga nakuha sa pagparehistro nga nakab-ot ang 91% sa 7.2 milyon nga target sa pagrehistro alang sa tuig 2023. Sa pagkakaron adunay 4,343,723 ka PhillDs ang na-isyu ug na-deliver na ngadto sa mga nagparehistro nga indibidwal sa Central Visayas.

Samtang, padayon nga gipadali sa Philippine Statistics Authority (PSA) ang pag-imprenta ug paghatod sa PhillDs ug pag-isyu sa ePhillDs para magamit isip balidong pruweba sa pagkatawo ug edad sa mga transaksyon.

Base sa website sa PSA niadtong Disyembre 29, 2023, mikabat na sa 50,332,413 ka PhilIDs ang na-print ug andam na alang sa paghatod.

Samtang adunay 45,649,707 ka indibidwal ang nakadawat na sa ilang PhilIDs sa tibuok nasod.

Ang PSA RSSO VII nagpabiling determinado sa pagparehistro sa tanang nahibiling indibidwal sa Central Visayas ug pagsiguro nga sila makatagamtam sa mga benepisyo sa pagkarehistro sa PhilSys, sama sa dali nga pag-access sa mga serbisyo sa gobyerno, mga transaksyon sa pinansyal, ug mga programa sa pagpanalipod sa katilingban. (BANAT NEWS)