Mga bombero nga 30 ang BMI niapil sa Biggest Loser Challenge

CEBU, Philippines — Ang Bureau of Fire Protection (BFP) nipasiugda sa Biggest Loser Challenge diin tumong niini nga kanunay’ng piskay ug layo sa sakit ang panglawas sa kabomberohan.

Kagahapon sa buntag gipahigayon ang pagtimbang sa 145 ka bombero diha sa Plaza Independencia.

Matud ni Fire Senior Inspector Johnrey Sanchez, doktor ug medical officer sa BFP-7 nga ang apil sa Biggest Loser Challenge mga bombero nga ang BMI (body mass index) nilapas og 30.

Gipasabot ni Sanchez nga ang 30 nga BMI matawag na nga obese class 1 hinungdan nga tumong sa Biggest Loser Challenge nga moubos ang timbang sa tanang naapil nga bombero og tulo ka porsyento ngadto sa lima ka porsyento.

Kapin sa duha ka buwan ang maong kalihokan sa BFP-7 diin ang first, second ug third winners mahibaw-an sa Mayo 24, 2024.

Matag Lunes ang mga partisipante mopadala og pictures ug videos sa ilang mga kakihokan apil ang blood pressure ug weekly weight monitoring.

Ang mga partisipante gidid-an kini sa paggamit og diet pills, laxative ug ubang chemically induced weight loss.

Nunot niini, usa sa mga kalihokan sa Bureau of Fire Protection (BFP)-7 sa Fire Prevention Month 2024 mao ang paglusad nila sa ilang Bikers First Aid Service Teams (BFAST).

Nasayran nga ang kabomberohan sa mga siyudad sa Sugbo, Mandaue,Talisay, Lapu-Lapu, Toledo ug ubang lugar sa Probinsiya sa Sugbo aduna nay BFAST.

Matud ni Chief Superintendent Roberto Genave, direktor sa BFP-7 nga gikinahanglan ang BFAST ilabi na sa Sugbo gumikan sa traffic nga nasinati.

Tumong niini nga paspas ang pagresponde sa kabomberohan samtang nagpadulong pa ang ambulansiya ug firetrucks.

Sa dili madugay ang BFAST ubanan kini og Patient Transport Vehicle.

Usa sa gisugyot nga ang mga bombero nga mosakay sa maong mga motorsiklo nipaubos og motorcycle course.

Nasayran nga mando sa ilang labaw nga ang 20 porsyento sa share sa fire code collections sa BFP sa mga LGU adto direkta sa pagpalit og motorsiklo.

Giproseso na kini karon, ang uban mas gipili kadtong motorsiklo nga makasaka og bukid tungod kay adunay mga dapit nga daghan og mga bukirang barangay.

Samtang sa Dakbayan sa Talisay upat ka motorsiklo nga gikombinar aron mahimong ambulansiya ang gigamit na sa kabomberohan sa siyudad. (BANAT NEWS)