Motor batok taksi, usa patay

CEBU, Philippines — Patay  ang usa ka motorista ug naangol  usab ang angkas niining babaye sa nahitabong aksidente  ala-una pasado ang takna sa miaging Domingo sa kaadlawon  sa dalan national sa Barangay Poblacion sa lungsod sa Consolacion.

Ang namatay giila sa kapolisan nga mao si Chris John Fontanoza Barro, 19- anyos nga taga Barangay Pulpogan sa maong lungsod.

Samtang ang naangol nga angkas niini giila nga mao si Beverly Nayre nga taga Pulpogan sa mao gihapong lungsod.

Ang taksi nga nakabangga gimaneho ni Angelito Alistre Alivio, 49, taga  Siyudad sa Naga.

Si Police Major Eric Gingoyon miingon nga padulong  sa Siyudad sa Sugbo ang taksi ug padulong usab sa amihanang ang motorsiklo mga biktima.

Dugang pa ni Gingoyon nga ang biktima nga si Nayre anaa pa karon sa tambalanan samtang si Alivio mitahan kanila human sa hitabo. (BANAT NEWS)