Ginang nga nagsuot og PNP athletic attire gidakop

CEBU, Philippines — Usa ka ginang nga giingong nagpa polis-polis gamit ang uniform sa kapulisan nasita sa checkpoint sa mga sakop sa Mandaue City Police Office diha sa Sitio Zuelig St., Barangay Subangdako, Mandaue City kagahapon sa buntag.

Ang nasikop tagoon lang usa nga pangalan Sandra, 44, minyo taga Barangay Lahug.

Matud pa ni Police Lt. Col Mercy Villaro, tigpamaba sa Mandaue City Police Office, nagpahigayon og checkpoint ang CMFC MCPO sa maong dapit sa dihang niagi ang maong ginang nga nagmotor nga nagsuot og PNP athletic uniform hinungdan nga kini gisita.

Sa dihang kini gisukit-sukit ug gipangayoan og dokumento nga nagpamatuod niini nga sakop kini sa PNP wala kini napakita gawas lang sa ID nga siya sakop og anti-crime group nga force multipliers sa kapolisan.

Tungod niini gidakop siya aron pasakaan og kaso nga kalapasan sa Article 179 sa Revised Penal Code.

Sumala pa ni Villaro, nga ang ginang nangrason nga nagsuot siya niini kay padung siya sa pag-umangkon nga gidagmalan sa kapuyo diha sa Dakbayan sa Lapu-Lapu.

Tungod sa iyang gibutyag, nakigalayon sila sa kapulisan sa Lapu-Lapu City aron pagsusi kun tinuod ang pangangkon niini ug aron matabangan ang pag-umangkon.

Si Villaro, nitug-an nga mapasakaan gayud og kaso ang maong ginang tungod sa pagsul-ob niya og uniporme sa kapulisan.--  IBM BANAT NEWS