LCPO manguha og dugang footage pag-ila sa nipusil sa tricycle driver

CEBU, Philippines — Gitinguha karon sa kapolisan sa Lapu-Lapu City Police Office (LCPO) ang pagbaton pa og laing footage sa closed circuit television (CCTV) camera alang sa  pag-ila sa kriminal kinsa nipusil patay  sa tricycle driver nga kanhi drug surrenderee samtang naghatud kini og pasahero nga babaye sa sulod sa compound sa Mactan Country Homes Subdivision sa Barangay  Babag sa maong siyudad niadtong Domingo sa gabii.

Si Police Lieutenant Colonel Christian Torres, pangulo sa City Investigation Detection and Management Unit (CIDMU) ug tigpamaba  sa LCPO nagkanayon nga naglakip sa gitinguha karon nga ilang mailhan ang babaye nga pasahero sa biktima nga ilang gituohan nga kakunsabo tungod kay sa paggawas gikan sa compound sa maong subdivision nakita kini nga nag-angkas  sa motorsiklo sa wala hiilhing mamumuno

Matud ni Torres nga pipila ka mga molupyo sa maong dapit ang nakamatikod nga ang biktima nga si Ramel Castillon, 47-anyos, taga Barangay Looc sa maong  siyudad ang gisundad sa mamumuno nga nagsakay og motorsiklo sa  pagsulod sa compound sa maong  subdivision.

Sa paghidangat sa eskina nga bahin sa dalan sa sulod sa maong subdivision kalit lang kining namusil  ngadto sa biktima kinsa nakaangkon og samad pinusilan sa iyang ulo nga hinungdan sa kamatayon niini.

Human sa maong pagpamusil nagdali sa paggawas ang kriminal sakay sa motorsiklo ug angkas na niini ang babayeng pasahero nga gihatud sa biktima.

Nakuha sa Scene of Crime Operation (SOCO) gikan sa lugar nga nahitaboan ang basiyo sa bala sa kalibre .45. BDB BANAT NEWS