Rama: Ang Cebu City gitukod sa katawhan

CEBU, Philippines — Gipahigayon ang ika-87th Charter Day sa Dakbayan sa Sugbo nga gisugdan sa usa ka Santos nga Misa sa Cebu City Hall diha sa may Plaza Sugbo.

Ang santos nga misa gipangulohan ni Msgr. Roberto Alesna, ang sakop sa Team of Pastor sa Archdiocesan Shrine of Santa Teresa de Avila.

Ang maong kalihukan gitambongan sa mga official sa siyudad nga gipangulohan ni Mayor Michael Rama, mga bisita ug mga kawani sa City Hall ug uban pa.

Si Alesna nipaambit sa iyang wali sa mga kalambuan sa siyudad pinaagi sa serbisyo sa mga nanglabay nga mga opisyales sa siyudad nga naktampo sa paglambo sa siyudad. Human sa santos nga misa gipahigayon ang wreath-laying ceremony sa estatwa ni Don Vicente Rama nga maoy amahan sa Cebu City Charter.

Si Rama sa iyang bahin mipahinumdom sa katawhan nga ang siyudad gitukod sa mga tawo, silang mga opisyal mensahero lamang. Si Acting Vice Mayor Donaldo Hontiveros sa iyang bahin niawhag sa mga Sugbuanon nga hinumduman kadtong mga naguna kanilang mga opisyales sa dakbayan nga nakatampo sa talagsaong panaw sa paglambo uban sa komunidad. (BANAT NEWS)