Klase sa tinun-an dili apektado pagbalik sa naandan nga school calendar

CEBU, Philippines — Dili maapektuhan ang required number of days sa mga tinun-an sa gipatuman nga transition sa school calendar suma pa ni Dr. Salustiano Jimenez ang Director sa DepEd Region 7.

Kini ang gipadayag ni Jimenez nonot sa gipagawas nga bag-ong kamanduan sa DepEd nga nagtakda sa pagtak-op sa School Year karong Mayo 31 ning tuiga.

Base sa DepEd Order Number 003 Series of 2024 nga gipirmahan ni Vice President ug DepEd Secretary Sara Duterte pinetsahan og Pebrero 19 gipahibawo sa ahensya nga ang opisyal nga pagtak-op sa School year karong Mayo 31 ug mobukas ang klase sa Hulyo 29.

Suma pa niya gimanduan ang mga tunghaan sa pag-adjust sa ilang calendar of activities ug padayon pa sila modawat sa magpa enroll nga mga bag-ong tinun-an bisan ug adlaw nga Biyernes ang ilang deadline sa registration.

Ang DepEd midasig sa mga tunghaan nga mohimo sa ilang End of School Year Rites gikan sa Mayo 29 ngadto sa 31, 2024.

Subay niini gihangop sa mga ginikanan, mga tinun-an ug mismo sa mga magtutudlo ang gipagawas nga kamanduan sa Department of Education.

Suma pa sa pipila ka mga ginikanan nga mas nalipay sila sa maong kalambuan tungod kay grabe ang kainit karon sa panahon ug maapektuhan ang panglawas sa mga tinun-an.

Gani dunay mga insidente sa pipila ka tunghaan nga nagsunggo ang mga bata tungod sa kainit ug mireklamo usab ang mga magtutudlo sa kainit sa ilang classroom.

Una niini gipadayag ni Duterte nga ang maong adjustment sa school calendar subay usab sa tinguha sa DepEd nga hatagan og unang pagtagad ang panglawas sa mga tinun-an ingon man sa mga magtutudlo. (BANET NEWS)