Cuenco niawhag sa pagsuspenso sa civil works sa CBRT

CEBU, Philippines — Si Konsehal James Anthony Cuenco sa Dakbayan sa Sugbo niawhag nga suspensohon ang civil works sa package 2 ug 3 sa Cebu Bus Rapid Transit samtang nagpaabot sa resolusyon sa mga isyu niini.

Niadtong Miyerkules, si Cuenco, chairman sa committee on transportation sa konseho sa siyudad niluwat og privilege speech atol sa executive diin buot niining masayran ang kabahin sa pagkalangan ug kalamboan sa CBRT.

Atol sa maong executive session, ang mga representante sa National Economic and Development Authority (NEDA) ug Department of Transportation (DOTr) nipatim-aw ug nipahibawo sa konseho sa kalambuan sa proyekto lakip na ang giplanong timeline niini.

Bisan pa sa tanang kalamboan nga gipadayag si Cuenco nagkanayon nga wala matubag kon makaayo ba ang maong proyekto sa mga Sugboanon.

Atol sa iyang privilege speech, si Cuenco niduso og mga motion nga nag-awhag sa DOTr sa temporaryong pagsuspenso sa civil works sa phase 2 ug 3 samtang naghulat sa pagmugna ug pagtigom sa CBRT Technical Working Group (TWG).

Giawhag usab ni Cuenco ang lead technical consultant alang sa operasyon ug pagmentinar sa CBRT sa pagpresentar sa ilang action plan.

Ug giawhag usab niya ang DOTr nga mosumiter sa feasibility study aron ma-justify ang pag-usbaw sa budget.

Gihangyo usab ni Cuenco ang DPWH nga i-update ang konseho sa siyudad sa nagpadayong negosasyon sa road right of way acquisition. BDB BANAT NEWS