Dul-an sa P1 milyon nga shabu nasakmit sa kapolisan sa Talisay

CEBU, Philippines — Dul-an sa P1 milyon ang kantidad sa shabu nga nasakmit sa kapolisan sa Dakbayan sa Talisay gikan sa tulo ka durugista diha sa Sitio Rattan, Barangay Tanke niadtong nigaing gabii.

Ang subject sa operasyon mao si Josie Lanie Ugdiman Loqueloque, Sr., 58-anyos, mananagat, residente sa lugar.

Samtang ang iyang mga kauban mao sila si Tarcelo Baculi, 37-anyos, mananagat usab ug si Brian Dale Samolde Sanchez, 39, e-bike driver, parehong residente sa lugar.

Ang kapolisan nipahigayon og buy-bust operation batok sa mga suspetsado.

Nasakmit sa kapolisan gikan sa mga suspetsado ang 125 gramos nga shabu nga gibana-banang nibalor ngadto sa P850 mil ug usa kalibre .45 nga pistola nga adunay upat ka buhing bala.

Gigingong ang mga suspetsado nangundang sa panagat ug pagmaneho og e-bike gumikan kay menos ang kita ug nisulod sa negosyo sa ilegal nga drugas.

Samtang sa Dakbayan sa Lapu-Lapu, nikabat ngadto sa P35,508 ang kantidad sa shabu nga nasakmit  sa kapolisan  sa Presinto 2  sa Lapu-Lapu City Police Office (LCPO) gikan sa pito ka mga pusher nga ilang  nadakpan atol sa tulo ka adlaw nila nga pagpahigayon sa Simultaneous Anti-Criminality Law Enforcement Operation (SACLEO).

Si Police Major Bonifacio Pareja, hepe  sa Presinto 2 nagkanayon nga ang maong gidaghanon sa mga pusher nga ilang nadakpan maoy resulta aa duha ka managlahi nilang operasyon.

Sa laing bahin, gitabangan sa kapolisan sa Lapu-Lapu City Police Office (LCPO) ang kanhi mga nalambigit sa ilegal  nga drugas  alang sa hingpit nilang pagbag-o human sa ilang drug rehabilitation nga gipasiugdahan sa lokal nga kagamhanan.

Si Police Colonel ELmer Lim, direktor sa  Lapu-Lapu City Police Office nagkanayon  nga giila na ang kanhi mga nalambigit sa ilegal nga drugas isip mga Anti -Illegal Drug Advocates kinsa nakiglambigit sa pribadong sektor alang sa pagtudlo kanila og panginabuhi nga dili na mobalik sa ilegal nga kalihokan.

Naglakip sa maong programa nga gipasiugdahan mao ang pagtudlo kanila  sa pagpamuhat og sabon, dishwashing liquid, detergent powder, fabric conditioner  ug toilet bowl cleaner.        

Kini ubos sa COPatid Products diin gipakita ang kalamposan sa ilang pagsalmot sa pagladlad sa COPatid products sa gipasiugdahan nga DILG "Kadiwa ng Pangulo” diin gipahigayon kini diha sa Lapu-Lapu City Hall lobby ug parking area niadtong Pebrero 15 ug 16, 2024. BDB BANAT NEWS