14 patay, 3 kritikal human ang truck nga ilang gisakyan nahagbong

CEBU, Philippines — Niabot ngadto sa 14 ka tawo ang patay ug laing tulo ang anaa sa kritikal ang kahimtang human natagak ang gisakyan nila nga truck de karga ngadto sa kurbadahon nga bahin sa Barangay Bulwang, Lungsod sa Mabinay, Probinsiya sa Negros Oriental pasado ala 1:00 sa hapon.

Matud ni Police Major Nelson Lamoco, hepe sa Mabinay Police Station nga ang Isuzu Canter gikan sa Lungsod sa La Libertad nga sakop gihapon sa Lalawigan sa Negros Oriental diin paingon kini ngadto sa Barangay Dawis sa Bayawan City.

Ug sa ilang pagpadulong sa Barangay Dawis ang truck de karga didto niagi sa Lungsod sa Mabinay.

Apan sa pag-abot sa Sitio Tubod, Barangay Bulwang, Lungsod sa Mabinay giingong nawagtangan og preno ang truck hinungdan nga wala na kini makontrolar sa drayber ug nilahos ngadto sa pang-pang.

Si Lamoco nagkanayon nga gibana-bana sa 40 ngadto na sa 50 metros ang gilawomon sa pang-pang.

Sa oras sa pagsuwat niining balita gisuta pa ang gidaghanon sa sakay sa truck. Nasyaran nga managparyente ra ang sakay niini nga paingon mangompra og baka ug kanding.

Dugang ni Lamoco nga ang dapit diin nahitabo ang aksidente usa ka accident prone area tungod kay kurbadahon kini ug daghan nang higayon nga adunay mga disgrasya nga nahitabo sa maong lugar.  (BANAT NEWS)