Ayuda sa solo parents sa Lapu-Lapu madawat na sa sunod buwan

CEBU, Philippines — Si Mayor Junard Ahong Chan sa Dakbayan sa Lapu-Lapu nihangop nga napili ang ilang siyudad nga maoy pilot testing area alang sa project solo ug nipahibalo nga sa sunod buwan madawat na ang unang pagpanghatag og tag P1,000 ngadto sa mga solo parent.

Ang mga beneficiary mao kadtong solo parent nga gagmay ang kita base sa gipalabang nga ordinansa sa siyudad.

Si Konsehal Annabeth Cuizon maoy niduso sa maong ordinansa diin adunay 1,600 ka solo parents ang anaa sa talaan sa siyudad apan sa record sa buhatan sa City Social Welfare Department adunay 533 ang kwalipikado nga makadawat og ayuda.

Human sa napulo ka buwan nga pilot project solo ang buhatan sa DSWD mohimo og pakisusi aron masuta ang mga maayong praktis ug kinahanglanon sa pagpatuman sa maong proyekto alang sa ilaha na unyang pagpatuman niini ngadto sa laing mga lokal nga kagamhanan tungod kay han-ay na.

Si Chan uban sa kadagkuan sa DSWD nga pinangulohan nila ni Shalaine Marie Lucero, direktor sa DSWD-7 nagpinirmahay og kasabotan kalabot sa maong proyekto diin ang Lapu-Lapu maoy usa sa tulo ka pilot areas sa nasud.

Ang proyekto sa DSWD nga Project Solo hingpit nga gipatuman human napasar ang Expanded Solo Parent Welfare Act nga nagtinguha sa pagtabang sa mga solo parent sa pag-alima sa ilang mga anak bisan sa mga hagit og kalisod nga ilang giatubang.

Gipili ang siyudad isip pilot area sa Central Visayas tungod sa kapasidad sa LGU nga makapatuman sa project solo gumikan kay aduna kini mga trabahante nga motutok, adunay opisina ug lig-on usab ang organization sa solo parents sa maong dakbayan.

Gibutyag ni Lucero nga ang maong mga solo parent makadawat og tag P1,000 matag buwan sulod sa napulo ka buwan ug mga psychosocial interventions. BDB BANAT NEWS