Palma moduso sa mga dokumento ngadto sa Roma alang sa dugang diocese

CEBU, Philippines — Si Archbishop Jose Palma sa Archdiocese of Cebu naglaom nga hingpit nga maaprobahan ang Sugbuswak sa dili pa matapos karong tuiga human iyang nakita nga tanang rekisitos ilaha na kining nasunod.

Matud ni Palma nga in principle ang maong tinguha nga pagpanganak og laing diocese sa Archdiocese of Cebu ngadto sa duha nga ipahimutang s Dakbayan sa Carcar ug Danao aprobado na kini sa Catholic Bishop Conference of the Philippines sa nilabay ng tuig hinungdan nga ilahang gilihok ang mga panginahanglanon aron maduso kini niya ngadto sa Roma.

Nakaduso na sila sa mga dokumento ngadto sa buhatan nga maoy motuon niini apan karong sunod buwan moadto siya sa Vatican sa Roma aron mopaabot usab sa dokumento nga ilang natigom gikan sa ilang mga tigom nga gihimo ug sa mga baroganan usab sa layko.

Si Palma nipadayag sa iyang kalipay ug mapasalamaton sa pagsumiter sa Commission on the Laity nga gipangulohan ni Fe Mantuhac-Barino sa ilang baroganan tungod kay nagpakita kini sa ilang dako nga suporta sa pagbuswak na usab sa lain nga diocese.

Si Palma nipadayag sa kadako sa Archdiocese of Cebu diin kinahanglan nga magdugang og lain nga diocese aron matubag ang ilang mga panginahanglanon.

Sa iyang bahin, si Barino nagkanayon nga dako kaayo ang ilang kalipay tungod kay gihatagan sila og kahigayonan nga makaapil ug madunggan ang ilang tingog ug damgo alang sa umaabot nga bag-ong diocese.

Gibutyag ni Barino nga aduna sila y giduso nga 18 ka baroganan nga maoy ilang nakita alang sa plans and programs alang sa duha ka bag-o nga diocese.

Ug gituki nila kini human sa gihimo nga General Pastoral Assembly sa archdiocese og gitahasan sila sa Arsobispo nga mopagawas sa ilang baroganan human si kanhi Chief Justice Hilario Davide, Jr. nipadayag sa maong pagkatawo sa duha ka diocese wala kaayo madunggi ang tingog sa mga layko. (BANAT NEWS)