HPG-7 duna nay gitutokan sa Redemptorist hit and run

CEBU, Philippines — Niapil na sa pag-imbestigar ang Highway Patrol Group (HPG) -7 mahitungod sa nahitabong hit and run nga niresulta sa kamatayon sa usa ka gradwado sa civil engineering nga basketball player diha sa dalan duol sa Redemptorist Church sa Barangay Camputhaw sa Cebu City niadtong nakalabay nga Domingo.

Matud sa Regional Chief sa HPG-7 Police Lieutenant Colonel Wilbert Parilla nakig-alayon na sila karon sa Abellana Police Station 2 ug duna na sab silay kopya sa CCTV footage bahin sa hitabo ug sa sakyanan.

Gani siya miingon nga dunay impormanteng mihatag kanila og impormasyon kabahin sa usa ka sakyanan nga mao kadto ang sakyanan nga naka hit and run kang Jeslar Uriel Larumbe.

"Dili pa gyud maingon nga mao na to siya, duna lay mga information nga atong na gather nga adunay posibilidad. We are just thankful nga naay informants nga nihatag nato og information mao ni atong gisubay, so hopefully mao unta ni,” si Parilla pa.

Ang Cebu City Police Office pinaagi sa Traffic Enforcement Unit niini naghimo na og backtracking sa mga lakaw sa biktima sa wala pa kini naaksidente.

Gisubay sab nila karon ang pagkuha og mga footages nga makapakita kun asa gikan o asa miagi ang sakyanan padung sa lugar diin nahitabo ang insidente.

Giklaro sab sa CCPO nga dili convoy kondili nag-inusara lang nga sakyanan nga nag-blinkers ang nakabangga kang Larumbe.  Sa pikas bahin, ang Land Transportation Office Central Visayas nakig-alayon sa mga otoridad aron sa maila ang driver og tag-iya sa maong sakyanan sumala pa ni LTO-7 Regional Director Glen Galario.

Sa pagkakaron wala pa silay mahatag nga impormasyon tungod kay wala pa silay klaro nga kopya sa CCTV footage nga maka identify sa plate number sa maong sakyanan.

Samtang si Konsehal Rey Geaon ang pangulo sa Traffic Management Council sa Cebu City niawhag sa kapolisan nga molusad og operasyon batok aning ilegal nga nigamit og blinkers ug sirens nga mga priadong sakyanan. IBM BANAT NEWS