Bag-ong traffic scheme gipatuman sa siyudad sa Mandaue

CEBU, Philippines — Hingpit na nga ipatuman sa kagamhanan sa siyudad sa Mandaue ang bag-ong traffic scheme sa dalan A.S. Fortuna sa Barangay Banilad ug dalan Hernan Cortes sa Barangay Subangdaku sa siyudad sa Mandaue.

Kini human giaprobahan sa konseho sa dakbayan ang resolusyon nga gipangamahanan ni Konsehal Jimmy Lumapas. chairman sa Committee on transportation atol sa ilang sesyon niadtong Lunes, Enero 22, 2024.

Sa maong bag-ong lagda gimando nga ang mga sakyanan gikan sa dalan Hernan Cortes sa Subangdaku adto na moliko sa sitio Panagdait paingon sa Siyudad sa Sugbo

Samtang ang mga sakyanan gikan sa siyudad Sugbo nga moagi sa dalan Hernan Cortes adto kini moliko sa tuong bahin sa A.S. Fortuna ug molahos na ngadto sa dalan M.C. Briones sa Highway Seno sa Barangay Guizo.

Sa laing bahin ang mga sakyanan nga nagdagan gikan sa M.C. Briones paingon sa siyudad sa Sugbo adto kini moliko sa tuo paingon sa dalan A.S. Fortuna sa Barangay Banilad sa siyudad sa Mandaue.

Sa maong resolusyon ni Konsehal Lumapas gimandoan sa pagpatuman sa bag-ong traffic scheme ang mga traffic enforcer sa Traffic Enforcement Agency of Mandaue (TEAM).   MEL BANAT NEWS