Tulo ka kawani sa CTMS nga positibo sa drugas mataktak sa trabaho

CEBU, Philippines — Matangtang sa ilang trabaho ang tulo ka mga traffic enforcer sa City Traffic Management System (CTMS) sa siyudad sa Lapu-Lapu nga nagpositibo sa surprise drug test nga gipahigayon sa City of Lapu-Lapu for Substance Abuse Prevention (CLOSAP).

Kini ang gikumpirmar ni Lapu-Lapu City Mayor Junard "Ahong" Chan ngadto sa mga tigbalita.

Ang tulo ka traffic enforcer nga nagpositibo sa paggamit og ilegal nga drugas maoy kabahin sa 115 ka mga job order employees nga gipaubos sa random drug test sa CLOSAP nga gipangulohan ni Garry Lao.

Si Mayor Chan miingon nga maoy naandan nilang gipatuman ang pagtaktak sa mga kawani nga mag-positibo sa paggamit og ilegal nga drugas.

Hinuon si Mayor Chan miingon nga kadtong nagpositibo posible pa nga ipaubos sa rehabilitation program sa CLOSAP aron ma-hire og balik sa trabaho human sa unom ka bulan.

Sa nasayran giluwatan ni mayor Chan ang kamanduan ngadto sa CLOSAP sa pagpahigayon og drug testing sa tanang kawani sa mga buhatan sa city hall apil na niini ang mga kawani sa matag barangay sa dakbayan.

Gitataw niya nga mahinungdanon kaayo nga himoon ang drug testing sa mga buhatan sa kagamhanan alang sa pagbaton sa drug-free workplace ingon man sa pagpugong sa krimen.   MEL BANAT NEWS