CEBU, Philippines — Wala nay gitugotan nga maka leave sa mga sakop sa Talisay City Disaster Risk Reduction and Management Office (CDRRMO) sa nahabilin nga adlaw sa 2023.
Kini maoy gibutyag ni Alvin Santillana, pangu sa CDRRMO.
Matud pa ni Santillana nga sukad pa sa unang adlaw sa Misa de Gallo naa na sila sa full force sa ilang trabaho.
Ilang gisiguro nga mahatagan dayon og dinalian nga tabang ang mga tawo nga manambong sa misa kung kini nagkinahanglan.
Asoy pa ni Santillana nga bisan unsa nga panghitabo andam sila nga motubag niini.
Ang Talisay adunay walo ka dagko nga simbahan nga maoy ilang gitutokan sa pagbantay tungod kay daghan ang tawo nga modagsa panahon sa misa de gallo.
Sigon pa niya nga molungtad ang ilang implementasyon nga walay maka leave sa trabaho hangtud na kini sa pagsugat sa bag-ong tuig.
Samtang si Talisay City mayor Gerald Anthony “Samsam” Gullas nipahinumdom sab sa tanang departamento nga andam kanunay kung adunay dagko nga panghitabo. (BANAT NEWS)