Mabdos napunggit sa wing van
CEBU, Philippines — Patay ang usa ka 26 -anyos nga mabdos dihang kini nadasmagan og wing van nga sakyanan atol sa paglabang niini sa dalan sa Barangay Looc,Siyudad sa Danao sa miaging Huwebes sa gabii, Nobiyembre 30, 2023.
Giila ang biktima nga mao si Gracel Castro Jayson nga nagpuyo sa Sitio Lantaw, Barangay Looc sa maong siyudad nga giingong upat na ka bulan nga buntis.
Sa taho ni Police Lieutenant Colonel Clark Arriola, hepe sa Danao City Police Station , alas -11 pasado sa Huwebes sa gabii ilang nadawat ang pahibalo sa nahitabong aksidente.
Sa pasiunang imbestigasyoin sa kapolisan ilang nahibaw-nga ang biktima gikan pa sa iyang trabaho sa Siyudad sa Lapu-Lapu ug padulong na mopauli sa ilang panimalay.
Ang drayber sa wing van nga sakyanan nga nakadasmag sa biktima giila nga mao si Ruel Guya Obana, 43, nga taga Barangay Lumay, Alang-Alang, Leyte.
Sa inisyal nga imbestigasyon, ang trak gikan sa habagatan padulong sa amihanan sa dihang napunggit ang biktima. Tungod sa kakusog sa pagbangga nalagpot ang biktima ug nalatayan gyud kini sa ligid.
Apan inay nga mohunong, gikatahong mipasutoy hinuon og padagan si Obana, apan naabtan kini sa kapolisan diha sa roro port sa Lungsod sa Carmen.
Gitanggong karon sa sulod sa holding facilities sa Danao City Police Station si Obana samtang giandam na ang kasong reckless imprudence resulting to homicide nga ipasaka kaniya. (BANAT NEWS)
- Latest
