CPA nakatala og 550 mil ka pasahero sa mga pantalan sa Sugbo

CEBU, Philippines — Mokabat sa 550 mil ka mga tawo ang nisulod sa dili mominos16 ka pantalan sa Sugbo sukad niadtong Oktubre 27 ngadto na sa Nobiyembre 5, 2023 kini base sa talaan sa Cebu Port Authority.

Sa talaan sa CPA sa ilang pagpatuman sa Heightened Alert Status atol sa Barangay ug Sangguniang Kabataan Elections 2023 ingon man sa Undas 2023 adunay arrivals nga 275,958 samtang ang departures niabot usab ngadto sa 267,597 o sa kinatibuk-an miabot sa 543,555 ka mga pasahero.

Matud pa ni Maryknoll Bolasa, ang tigpamaba sa CPA, wala silay natala nga insidente bisan sa kadaghan sa mga pasahero sa tibuok 16 ka pantalan sa Sugbo.

Dugang pa ni Bolasa, na accommodate ra tanan nga mga pasahero sa mga terminals tungod kay ang mga partner nila nga mga shipping naghatag man usab ug dugang mga biyahe aron sa pagsiguro nga walay stranded nga mga pasahero.

Ang sunod nga pangandaman sa CPA mao na usab ang pagdagsa sa mga pasahero panahon sa holiday season sa Pasko ug Bag-ong Tuig.

Gitug-an ni Bolasa, nagpaabot pa sila sa Department of Transportation sa direktiba para sa tanang transport agencies. (BANAT NEWS)