CEBU, Philippines — Nitambag ang pangu sa Talisay City Disaster Risk Reduction and Management Office nga kung mahimo pabawnon gyud ang mga tinun-an aron malikayan ang pagpalit og makaon ug malikayan ang food poisoning.
Gitug-an ni Alvin Santillana, pangu sa CDRRMO nga ning pagsugod sa tingklase nagkadaiyang matang sa emergency ang ilang gitubag.
Kini maoy hinungdan nga nihimo sila og pagtudlo sa basic life support sa mga magtutudlo sa 44 ka mga pampublikong tunghaan sa Talisay.
Matud pa ni Santillana, niadto pang Hulyo gisugdan sa mga personnel sa CDRRMO ang pagtudlo sa Basic Life Support sa mga magtutudlo gikan sa pampubliko ug pribadong eskwelahan.
Gilakip nila ang paghangyo sa mga magtutudlo nga tambagan ang mga ginikanan nga pabawnon ang ilang kabataan og pagkaon aron di na kini magpataka og palit.
Samtang ang Talisay City Health nipadayag na usab nga mohimo og random nga inspection sa nagkadaiyang gibaligya nga ilimnon sa mga school canteen.
Apil sa ilang susihon ang mga baligya nga mainum ug makaon sa tunghaan. — Rowena D. Capistrano (BANAT NEWS)