CEBU, Philippines — Gikatakdang sugdan na sa pag-trabaho ang upat ka andana nga munisipyo sa lungsod sa Minglanilla human gihimo ang groundbreaking ceremony sa proyekto sa miaging semana.
Sa pagkakaron, padayon sila nga naghatag og serbisyo sa karaang munisipyo.
Nakita sa mga opisyales sa lungsod nga gumikan sa nagkasaka nga populasyon gikinahanglan na nga hulipan og mas dako nga edipisyo aron hamugaway sa mga kawani ug konstituwenti nga adunay tuyo sa nagkalain-laing buhatan.
Ang bag-o nga munisipyo itukod diha dapit sa Minglanilla Central School o diha kilid sa ilang sports oval.
Ang desinyo niini nagbutang sab sa halapad nga parkingan aron dili makabara sa trapiko ang mga sakyanan nga magparking lang sa karsada.
Gawas sa bag-o nga munisipyo nagpahigayon sab og groundbreaking sa proyekto sa drainage sa Barangay Tulay ug uban pa alang sa ilang prayoridad nga proyekto. (BANAT NEWS)