Mga armas nga expired ang lisensiya ipa-surrender

CEBU, Philippines — Mopahigayon og one-stop shop caravan sa License to Possess and Own Firearms ang Cebu Police Provincial Office karong Hulyo 19 ug 20, 2023 diha sa Dakbayan sa Naga.

Sigon ni Police Major Mariegin Encio, tigpamaba sa Cebu Police Provincial Office nga kadtong mga naghupot og armas kansang lisensiya o rehistro napaso na mahimong moadto sa Naga aron maka-renew niini.

Gihimo kini sa kapulisan sa Probinsiya sa Sugbo isip kabahin sa ilang kampanya batok loose firearms.

Matud ni Encio nga padayon ang ilang revitalized Oplan Katok diin hangyuon nila kadtong mga naghupot og armas nga ang lisensiya expired na o kaha nagproseso pa sa pag-renew niini sa pag-surrender una niini sa tinugyanan sa balaod alang sa safe keeping.

Sa kasamtangan duna sila’y 2,258 nga subject sa ilang Oplan Katok.

Gipanglantawan nga dili lang ang dakbayan sa Naga ang mohimo og caravan apan lakip na ang ubang lugar sa Probinsiya sa Sugbo.  IBM (BANATNEWS)