Tinuod nga fair market value sa mga patigayon gikinahanglan – Garcia
CEBU, Philippines — Moabot sa 16 gikan sa 44 ka munisipyo o lokal nga kagamhanan ang pakyas pagsumiter ngadto sa Kapitolyo sa Sugbo sa updated nga reassessment sa fair market value sa mga balay patigayon sa ilang lokalidad.
Atol sa tigom uban sa mga municipal assessors niadtong Hunyo 5, wala mauyoni ni Gobernador Gwendolyn Garcia nga wala makasumiter ang 16 samtang ang 28 ka LGUs nakasumitir.
Si Garcia una kining nimando sa pag-umol og assessment team sa 44 ka munisipalidad sa Probinsya aron mohimo og survey ug report sa updated nga improvements nga gihimo sa mga businesses establishment sa matag LGU alang sa “improved” real property tax (RPT) nga koleksyon.
Ang maong team gilangkoban sa municipal assessor, municipal treasurer, municipal engineer, ug representante sa mayor’s office.
Sumala sa Sugbo News, ang news portal sa Probinsya sa Sugbo apil sa mga LGUs nga wala makasumiter mao ang lungsod sa Bantayan, Daanbantayan, Pinamungajan, Asturias, Badian, Dumanjug, San Francisco, Alegria, Borbon, Madridejos, Santa Fe, Santander, Tabuelan, Malabuyoc, Ronda, ug Samboan.
Gihatagan hinoon sila og tulo ka semana sa Gobernador aron makahimo og aksyon sa dili pa ang laing tigom sa Hunyo 26.
Ang Kapitolyo adunay makuha nga gahin sa RPT gikan sa mga LGU.
Matud ni Garcia nga tungod kay niubos ang national tax allocation (NTA) alang sa mga LGUs karong tuiga, ang mga local chief executives maoy napugos pagpangita og dugang pondo aron mapun-an ang kakulang na sa makuha nga income ug aron usab makapadayon sa pagpondo og programa ug proyekto sa tagsa tagsa niini ka lokalidad. /MEL (BANAT NEWS)
- Latest
