CEBU, Philippines — Gidayeg ni Talisay City mayor Gerald Anthony “Samsam” Gullas ang mayor sa lungsod sa Minglanilla, mayor Rajiv Enad gumikan sa gipakita niini nga kakugi aron mapalambo ang lungsod.
Kini atol sa inagurasyon sa multipurpose ug evacuation center sa Barangay Cadulawan nga gitambongan ni Gullas.
Suma pa sa mayor nga nahuman na gyud ang dugay na nga gipangandoy nga multipurpose bldg sa Cadulawan.
Asoy pa ni Gullas nga sa panahon nga kongresista pa siya nagsige na siya og hatag og pundo sa proyekto hangtud nga si kongresista Rhea Gullas nasab ang naa sa katungdanan.
Gikalipay sab si Gullas nga gipadayon ni mayor Enad ang proyekto.
“Ako lang dakong pasalamat sa pagkugi nga gihimo ni Mayor Rajiv Enad tungod kay pinaagi sa iyang kugi aduna gyuy kalamboan ang lungsod sa Minglanilla,” nagkanayon si Gullas.
Si Enad nibutyag nga siya nalipay nga aduna na gyud magamit ang mga residenti sa Cadulawan sa ilang mga kalihukan ug aduna nay kadaganan o kabakwitan ang mga residente sa higayon nga dunay motumaw nga katalagman. (BANAT NEWS)