Halin sa lechon sa Talisay wala maapektahi

CEBU, Philippines — Wala ra maapektohi ang halin sa mga namaligya og kinilong lechon sa Dakbayan sa Talisay bisan paman sa hulga sa African Swine Fever (ASF).Kini maoy gipahibawo ni Meryl Tan, kinsa mamaligyaay og lechon diha sa Lechon Park sa Poblacion, Talisay.

Matud pa niya nga naa ra man gihapon mamalit og lechon pero ang ilang problema mao ang supply sa baboy.

Apan sa paglibkas ni Gobernador Gwendolyn Garcia sa border control checkpoints sa nagkalain-laing lungsod gipaabot nilang ma normal na ba pagbalik ang supply sa baboy.Niadtong Miyerkules sa buntag nawagtang na ang tent nga gipundohan sa mga otoridad nga nagpahigayon og checkpoint sa Talisay.

Giuyonan ni Mayor Gerald Anthony “Samsam” Gullas ang lakang sa gobernadora aron dili makaluluoy ang namuhi og baboy.

Agi og pagpakita og suporta sa nagnegusyo og baboy silang mga opisyales nagdungan sa pagkaon og inasal aron makit-an sa kadaghanan nga luwas ra gyud ang baboy sa Sugbo. — /IBM (BANAT NEWS)