Opisyales sa barangay gipaapil sa ASF simulation exercise

CEBU, Philippines — Malamposon ang gipahigayon nga African Swine Fever Tabletop Simulation Exercises kinsa ang opisyales sa mga barangay sa Dakbayan sa Sugbo ang nitambong niini.

Matud ni Dr. Alic Utlang, assistant to the mayor on special projects ug naghupot usab sa Information Education Campaign nga kabahin ang nahisgutang kalihokan sa mga lakang sa siyudad aron masiguro nga dili makasulod ang ASF sa Dakbayan sa Sugbo.

Gihatagan og importansiya sa siyudad ang dakong tabang sa opisyales sa barangay alang sa maong kampaniya gumikan kay sila maoy una nga masayod sa sitwasyon sa ilang hurisdiksiyon.

Ug motabang usab sila sa monitoring sa mangabot nga karne diha sa ilang mga lugar. Nitambong usab sa maong simulation exercises ang mga representante sa  Department of Agriculture -7, chairman sa  committee on agriculture sa konseho Konsehal Jun Alcover ug ang pangulo sa City Agriculture Department Joey Baclayon.

Sa pagka-karon, nagpabiling zeron ang kaso sa ASF sa Dakbayan sa Sugbo ug sa  tibuok reghiyon-7.

Gani dunay lapad nga monitoring ang Department of Veterinary Medicine and Fisheries (DVMF) nga gipangulohan ni Dr. Jessica Maribojoc sa mga karneng baboy nga mangabot sa siyudad gikan sa laing lugar.

Ang kagamhanan sa Siyudad sa Sugbo nisagop gihapon sa polisiya sa  Probinsiya sa Sugbo sa temporaryong pagdili sa pagpasulod sa mga buhing baboy ug produkto nga baboy bisan sa mga livestock transport vehicles gikan sa Iloilo ug Panay Island padulong sa Probinsiya sa Sugbo .

Kabahin sa polisiya mao ang istrikto nga border control ug veterinary quarantine measure nga ipatuman sa mga cargo sa tanang ports of entry sa Sugbo. (BANATNEWS)