Imahen ni Santo Niño ug San Pedro Calungsod magkauban sa prosesyon

CEBU, Philippines — Subay sa selebrasyon sa Fiesta Señor adunay solemn foot procession nga ipahigayon diin makauban sa imahen ni Senior Santo Niño ang imahen ni San Pedro Calungsod.   

Nasayran nga mao kini ang labing unang higayon nga ang imahen ni San Pedro Calungsod makauban sa imahen ni Santo Niño.

Ang maong kalihokan ipahigayon karong Biyernes ug manukad kini diha sa San Pedro Calungsod Shrine paingon sa Basilica.

Gikataho nga sa alas 5:00 sa hapon sa maong adlaw adunay pasiunang kalihokan diha sa San Pedro Calungsod Shrine nga pasiugdahan sa Metro Cebu  North District 1 Youth Coordinating Council ug sundan dayon kini sa  solemn foot procession sa nahisgutang duh aka imahen.

Mogikan kini diha sa Archbishop’s Residence Compound ug moagi diha sa D. Jakosalem St. paingon sa Sikatuna St ug sa Imus Ave.

Motuyok kini diha sa Barangay Day-as paingon sa Mabini St. lahos sa P. Burgos St. ug moliko diha sa Osmeña Boulevard dayon mosulod diha sa Basilica.

Motak-op ang prosisyon sa alas 7:00 sa gabii diin ipahigayon ang novena mass diha sa Basilica Minore del Santo Niño ug ang mo-preside niini mao ang chairman sa Commission on Youth Cebu nga si Reverend Father Andrei Ventanilla. Lakip sa mosalmot niini mao ang nagkadaiyang miyembro sa Parish Youth Coordinating Council sa nagkadaiyang parokya sa Sugbo.  (BANATNEWS)