CEBU, Philippines — Dili makaapil sa fluvial procession karong Enero 14, adlaw’ng Sabado kun dili ma-register kini maoy giklaro sa Philippine Coast Guard (PCG)-7.
Si Lt. Jr. Grade Stephen Pagcaliwagan, tigpamaba sa PCG-7 nagkanayon nga sa pagkakaron upat pa lang kabuok sea vessels ang nagparehistro aron moapil sa fluvial procession, apan gibutyag niya nga dunay kapin 20 ka indibidwal ang nangayo og mga rekisitos aron magparehistro alang sa maong kalihukan.
Gilauman sa Philippine Coast Guard nga usa ka gatus ngadto na sa 200 ka mga sea vessels ang moapil sa fluvial sa procession. Wala pay deadline kun kanus-a kataposang modawat og magparehistro.
Pipila sa mga rekisitos nga pangayoon sa Coast Guard kaning MARINA certificate, certificate of ownership, registry, manning certificate, gross tonnage certificate ug uban pa.
Karong adlawa, Enero 7, Sabado, moabot ang BRP Cabra (MRRV-4409) sa Philippine Coast Guard nga maoy gamiton nga galeyon sa fluvial procession.
Ang Basilica Minore del Sto. Niño na ang moadorno sa BRP Cabra pahaom nga kargahan sa imahen sa Balaang Bata.
“Ang makasakay sa galeon, ang Basilica personnel, coast guard personnel, selected media ang other VIPs,” matud ni Pagcaliwagan. Giawhag ang mga nagtinguha nga moapil sa fluvial procession nga moadto sa buhatan sa PCG-7 ug magpa-register na. (BANATNEWS)