CEBU, Philippines — Mayor Gullas nalipay sa subling pagpahigayon sa Intramurals sa TCC
Sulod sa duha ka tuig nga naputol ang mga kalingawan gumikan sa pandemya, ang Talisay City College (TCC) nibalik na sa ilang tinuig nga Intramurals.
Gidagsa sa mga tinun-an ug tumatan-aw ang pagbukas sa ilang kalihukan diha sa hawanan sa Talisay City Central School niadtong Sabado sa buntag.
Si Dr. Richel Bacaltos, presidenti sa tunghaan maoy nangulo sa kalihukan uban sa mokabat sa 5 mil ka mga tinun-an nga nikuha og lain-laing kurso sa tunghaan.
Suma pa ni Talisay City mayor Gerald Anthony “Samsam” Gullas kinsa maoy pinasidunggang dinapit nga mapasigarbohon siya nga nakasaksi sa kalihukan diin nakita ang panagway sa mga tinun-an nga malipayon.
Sa pagsalmot sa nagkalain-laing kalihukan makahigayon ang mga tinun-an nga maka abi-abi sa ilang mga kauban sa tunghaan ug mapalig-on ang ilang relasyon nga maoy modala kanila sa paglambo sa ilang kaugalingon.
Nagkanayon ang mayor nga mao na kini ang panahon nga maglingaw ang tanan human sa duha ka tuig nga kini naputol gumikan sa pandemya. (BANATNEWS)