CEBU, Philippines — Nagtinguha ang kagamhanan sa Lungsod sa Esperanza sa Probinsiya sa Masbate nga maoy mokobra sa tanang kita gikan sa mga mobisita sa Isla sa La Manok nga sakop sa Lungsod sa Daanbantayan sa Probinsiya sa Sugbo.
Ang lakang nagpaabot nalang sa pag-uyon sa lokal nga kagamhanan sa Lungsod sa Daanbantayan.
Ang La Manok Island nahimutang taliwala sa Cebu ug Masbate diin ang duha ka lungsod nag-ilog sa pag-angkon niini.
Sa pagkakaron, ang kagamhanan sa Lungsod sa Daanbantayan ang kasamtangang nangolekta sa bayad sa mga divers ug ubang mga mobisita sa isla.
Karong Miyerkules, ang Sangguniang Bayan sa Daanbantayan gikatakdang motuki sa resolusyon nga maghatag og katungod kang Daanbantayan Mayor Sun Shimura sa pagpirma sa Memorandum of Understanding tali ni Esperanza Mayor Fernando Talisic alang sa pagdumala sa isla.
“There is a need to put in place all the responsibilities of both parties, the Municipality of Daanbantayan and Municipality of Esperanza, thru the execution of a Memorandum of Understanding,” pagbasa sa resolusyon ni gipangamhanan ni Konsehal Lolita Ybañez.
Base sa kopya sa sugyot nga MOU nga nahipos sa Banat News nga ang Lungsod sa Daanbantayan moabag sa Lungsod sa Esperanza sa pagdumala sa isla ug pagkuha sa mga papeles gikan sa Department of Environment and Natural Resources pinaagi sa Bureau of Forest Management.
Nalatid usab sa maong MOU nga ang makolekta gikan sa mga bisita sa isla, snorkeling, diving ug ubang eco-tourism activities mahiadto sa panudlanan sa Lungsod sa Esperanza. (BANAT NEWS)