Hiyas ni Andres Bonifacio angayan panaminan ug sundon

CEBU, Philippines — Ang paghatag og dakong gugma sa nasud maoy usa sa mga hiyas ni Andres Bonifacio nga kanunay nga panaminan sa katawhan nga angayan usab sundon. Mao kini ang nipatigbabaw nga mga mensahe kagahapon, Nobiyembre 30 atol sa kasaulogan sa 159th birth anniversary ni Bonifacio.

Sila si Cebu City Mayor Michael Rama ug Bise Mayor Raymond Alvin Garcia ang nangulo sa wreath laying ceremony nga gipahigayon sa Plaza Independencia.

Nahisgutan ni Rama ang pagkaligdong sa tawo kun motuman kini sa mga lagda sa gobyerno ilabi na ang pagbaton og disiplina.

Samtang atol sa iyang speech, gidasig ni Garcia ang kabatan-onan nga magtamod sa mga maayong mithi ni Bonifacio.

Gibutyag sa pangu sa Cultural and Historical Affairs Office (CHAO) nga si Bryner Diaz nga importante kaayo nga dili baliwaon sa kabatan-onan ang pagsaulog sa maong okasyon.  Gidugang niini nga kinahanglan kaayo nga hinumdoman gihapon sa bag-ong henerasyon ang sakripisyo sa mga bayani.

Samtang si Presidente Ferdinand “Bongbong” Marcos Jr. nangulo usab sa kalihokan sa espesyal nga adlaw ni Bonfacio kagahapon didto sa Caloocan City. Giawhag usab niya ang katawhan nga mabinantayon kanunay aron protektahan ang nasud.

Samtang nagpahigayon usab og rally ang mga sakop sa militanteng grupo kagahapon diin ilang gisinggit ang pagpakigbisog sa tawhanong katungod.

Dul-an sa usa ka gatus ka mga miyembro sa cause-oriented groups ang nagpahigayon og dungan nga rally sa nagkalain-laing dapit sa dakbayan.

Miapil sa rally mao ang mga miyembro sa Anak Bayan Cebu, Bayan Muna, National Union of Peoples Lawyers, Kabataan, Sentro ng mga Nagkakaisa at Progresibong Manggagawa ug uban pa.

Matud sa Vice Chair sa Anak Bayan Cebu Denwhil Cañete nga ang ilang grupo nanawagan og umento sa suhulan ug paubsan ang presyo sa mga nag-unang palaliton.  Si Police Lt. Col. Wilbert Parilla, Deputy City Director for Administration sa Cebu City Police Office miasoy nga wala ray mitumaw nga dili maayong panghitabo subay sa maong kalihukan. —Decemay P. Padilla (BANATNEWS)