CEBU, Philippines — Aron matagbaw ang mga partisipante sa umaabot nga Suroy-Suroy Sugbo karong weekend, si Gobernador Gwendolyn Garcia mipahinumdom sa mga tourism officers ug mga resort operators nga ipakita ang Filipino brand sa hospitality o pag-atiman sa mga bisita.
Nakigtigom ang gobernador sa tourism officers ug mga resort operators niadtong Nobiyembre 15 aron nga mahan-ay na ang tanan sa pagpahigayon sa tulo ka adlaw nga kalihokan.
“This is the first Suroy-Suroy nga atong i-hold after two years, mao na nga we will pull out all stops ha, all systems go, tinabangay tanan para we can have a very successful Suroy-Suroy Sugbo.” Matud ni Garcia.
Kahinumduman nahunong ang pagpahigayon sa Probinsya sa Sugbo sa Suroy-Suroy Sugbo nonot sa pagtumaw sa COVID-19 pandemic.
Karong tuiga ang Suroy-Suroy gitawag og southern heritage trail nga mobisita sa mga lungsod ug siyudad na sab sa habagatang bahin sa Sugbo.
Mopakita kini sa mga tourist destination, social, culture ug culinary treasures sa mga lungsod sa habagatang Sugbo sugod karong Nobiyembre 18 ngadto sa 20.
Lakip sa suroyon ang mga lungsod sa Minglanilla, San Fernando, Sibonga, Argao, Dalaguete, Alcoy, Boljoon, Oslob, Santander, Samboan, Ginatilan, Malabuyoc, Alegria, Badian, Moalboal, Alcantara, Ronda, Dumanjug, Barili, Carcar City, Naga City ug Talisay. (BANATNEWS)