CEBU, Philippines — Ang tanang kalihokan sa Fiesta Señor nga wala mapahigayon sulod sa duha ka tuig tungod sa COVID-19 pandemic ang ibalik na sa sunod tuig.
Kini ang gibutyag ni Padre John Ion Miranda, media liason sa Basilica Minore Del Santo Niño Fiesta Committee.
Matud ni Miranda nga malipayon sila nga mopahibalo uban sa mga nagkadaiyang committee nga ibalik na ang tanang religious activities alang sa Enero 5 ngadto sa 20, 2023 Fiesta Señor.
Ang kadagkoan sa Basilica uban sa mga nagkadaiyang committee mopahigayon og press conference karong November 15, 2022 aron mopadayag sa tanang kalihokan sa sunod tuig.
Gibutyag ni Miranda nga sa sunod tuig ibalik na usab nila ang misa novena diin magsugod kini sa alas 4:00 sa kadlawon ngadto sa alas 7:00 sa gabii.
Giklaro ni Miranda nga mosunod gihapon sila mga advice sa concern agencies lakip usab sa Inter-Agency Task Force for the Management of Emerging Infectious Diseases.
Si Miranda nagkanayon nga padayon gihapon ang mga tigom sa nagkadaiyang agencies hangtud na nga moabot ang Fiesta Señor.
Samtang si Konsehal Phillip Zafra, pangulo sa peace and order sa konseho sa Dakbayan sa Sugbo nibutyag nga padayon ang ilang mga gihimo nga pagpangandam alang sa nagsingabot nga Fiesta Señor pinaagi sa mga tigom nga ilang gihimo sa tanang concern agencies lakip usab sa mga kadagkoan sa simbahan. BDB (BANATNEWS)