Curfew sa mga menor sa Lapu-Lapu gibalik og patuman

Curfew sa mga menor sa Lapu-Lapu gibalik og patuman

Romeo T.  Limpangog

CEBU, Philippines — Si Mayor Junard "Ahong" Chan sa Dakbayan sa Lapu-Lapu nimando ngadto sa kapolisan sa pagbalik sa pagpatuman sa curfew ordinance alang sa mga menor de edad.

Nunot sa maong kamandoan, si Chan niuban sa mga polis sa niaging gabii sa unang adlaw sa operasyon sa curfew sa mga menor nga magsugod sa alas 10:00 sa gabii hangtud sa alas 5:00 sa buntag.

Nasayran nga si Chan naaghat sa pagpatuman og balik sa curfew ordinance sa mga menor tungod sa nahitabo sa niaging Domingo kinsa usa ka buta o Person With Disability ang gitulis ug nakuha ang bag nga gisudlan sa kwarta niini.

Ug giingong gumikan sa panawagan ni Chan nga motahan ang tulisan ug sa gipahigayon nga follow operation sa kapolisan usa sa upat ka tulisan ang unang nitahan sa iyang kaugalingon ngadto sa kapolisan ug nisunod sa pagtahan ang laing tulo ka menor nga suspetsado sa pagpanulis.

Ang maong upat ka menor nga suspetsado gitugyan kini ngadto sa buhatan sa Department of Social Welfare and Development (DSWD) diin sila gikustodiya.

Matud ni Chan nga sukad nga gihunong sa pagpatuman ang curfew sa mga menor iyang namatikdan nga daghang menor de edad ang naglaroy-laroy panahon sa gabii.

Si Chan niawhag sa mga ginikanan nga bantayan ang ilang mga anak ug badlongon kini sa ilang paglaroy-laroy diha sa gawas panahon sa kagabhion. —Rowena D. Capistrano/BDB (BANATNEWS)