Wa sweldohi, sikyu nanulis

CEBU, Philippines — Kawad-on maoy nagtukmod sa usa ka security guard nga manulis og gasoline station pasado alas 12 sa udto niadtong Septiyembre 26, 2022 sa Purok 3, Barangay Bonbon, Lungsod sa Aloguinsan.

Apan gidemalas kini kay nadakpan dayon siya sa kapolisan ug gitanggong karon sa prisuhan sa Aloguinsan Police Station. Ang suspek mao si Reynato Joverin Sarquilla, 46, residente sa naasoy nga dapit.  Matud sa hepe sa Aloguinsan Police Station Police Lieutenant Roberto Barnido Jr. ang nakadawat og tawag gikan sa concerned citizen nga matud pa dunay gitulis nga gasoline station.

Gipaadto dayon niini iyahang mga tawo ug nasuta nga dunay tulis nga nahitabo pagka alas 12:32 base sa kuha sa CCTV.

Gipangutana sa imbestigador ang pump  boy sa gasoline station ug nasuta nga ang suspek sa pagpanulis regular customer sa ilang gasolinahan kay natiman-an naman ang motorsiklo niini, suot nga sinina ug ang gisuot nga helmet.

Pinaagi niini, duna na dayoy person of interest ang kapolisan bahin sa maong kaso.

Dihang giadto sa kapulisan ang panimalay sa suspek wala kini didto maong nagpahigayon sila og hot pursuit operation sa gitrabaho sa suspek.

“Duol-duol raman gud ni ang gasoline station ug ang balay sa suspek, naa ra sa mga one kilometer to two kilometers ra man siguro. Pag-adto nato sa balay sa atong person of interest wala dira, mao tong nag conduct ta og hot pursuit didto sa iyahang gi duty-han, pag-abot nato didto naa didto ang motor unya ang suspect sad,” sigon ni Barnido.

Pag-abot sa kapulisan sa gitrabahuan sa suspek ilaha kining gi-interview ug didto matud pa miangkon nga siya maoy nagtulis sa gasoline station.

Si Barnido miasoy nga mitug-an ang suspek nga tungod sa kawad-on ug wala pa hangtud karon makadawat sa iyang sweldo maong nabuhat niini ang pagtulis sa maong gasolinahan.

Ang gwardiya  adunay unom ka anak ug giingogn katapusang nakadawat sa iyahang sweldo niadto pang buwan sa Hulyo.

“Gipangutana nato kapila na niyang gibuhat, pirmero pa ni niya nga pagpanulis unya ang gigamit nga firearms dili issue sa iyahang agency, iya ning personal nga gihatag sa iyahang amigo,” sigon ni Barnido.

Gipangayoan nila og dokumento ang dinakpan labot sa armas niini apan wala kini napakita.

Ang dinakpan mag-atubang og kasong robbery with intimidation kay nagpabuto kini sa iyahang armas ug illegal possession of firearms.

Wala ra hinooy naangol sa dihang nagpabuto sa iyahang armas ang suspek sa pagdeklarar niini og tulis kay adto man niya kini gipabuto sa semento.

Gihimo lang niya kini isip pagpanghadlok sa mga empleyado sa sa gasoline station dayon kuha sa kwarta nga P10,000.— IBM (BANATNEWS)