Lalaking nasakmitan og mga armas gikatakdang pasakaan og mga kaso

CEBU, Philippines — Giandam na karon sa kapolisan sa Dakbayan sa Sugbo ang mga kaso batok sa usa ka 52-anyos nga kanhi nidagan pagka-mayor sa usa sa mga lungsod sa amihanang bahin sa Probinsiya sa Sugbo.

Si Roberto Herrera, real estate broker, nasakmitan kini og ilegal nga mga armas ug drugas human gireklamo ang suspetsado nga nagpabuto sa iyang armas diha sa usa ka condominium sa Barangay Busay, Dakbayan sa Sugbo, niadtong Lunes sa buntag.

Si Herrera kanhi nikandidato pagka-mayor sa Lungsod sa Medellin ang gikatakdang pasakaan og kasong alarm and scandal, paghupot og mga armas nga walay lisensiya ug ginadiling drugas.

Giingong ang guardiya sa condominium nakakita sa suspetsdo nga nagpabuto kini og long firearm diha sa balcony sa condominium unit niini.            

Ang guards on duty niabag kini sa Special Weapon and Tactic personnel diin ilang gituktok ang pultahan sa condominium unit sa suspetsado ug pag-abli niini sa pultahan nakita ang klase-klaseng mga armas nga gilatag diha sa sawog.

Atol sa gihimong clearing operation sa mga sakop sa SWAT nakita diha sa usa ka kwarto sa condominium unit sa suspetsado ang cocaine ug marijuana.

Nasakmit gikan sa suspetsado ang duha ka .556 M4Riffles; duha ka shotgun; duha ka .9mm pistol caliber carbines; usa ka glock 19 ug us aka kalibre .45 nga pistola, nagkalain-laing magazine, mga bala,mga kabhang sa bala ug usa ka teaser gun.

Ang suspetsado nakapakita lang kini og dokumento sa iyang glock pistol.

Matud ni Police Lieutenant Maria Theresa Macatangay, tigpamaba sa Cebu City Police Office nga giandam nila karon ang pagpasang-at og kaso batok sa suspetsado.

Ug mopahigayon usab sila og imbestigasyon kabahin sa paghupot sa suspetsado og mga tag-as nga kalibre sa armas. BDB (BANATNEWS)