Ika-upat nga hugna sa national vaccination days nagsugod karon

CEBU, Philippines — Moabot ngadto sa 13,000 ka indibidwal ang target sa Cebu City Government nga mabakunahan atol sa ika-upat nga hugna sa national vaccination days karong adlawa hangutd sa Marso 12, 2022.

Matud ni Dr. Jeffrey Ibones, officer-in-charge sa Cebu City Health Department nga gihan-ay na nila ang 30 ka vaccination sites alang sa maong kalihokan.

Gibutyag ni Ibones nga nagpatabang na usab sila sa opisyales sa barangay pinaagi sa Department of Interior and Local Government aron awhagon ang katawhan nga magpabakuna.

Aron mabakuhan ang mga bata nga nag-edad og 12 ngadto sa 17-anyos kinsa hangtud karon wala pa magpabakuna adunay pop up vaccination sites nga modawat og vaccination sa maong mga age bracket.

Ang alang sa 5 ngadto sa 11-anyos nga mga bata kadtong tulo ra gihapon nila ka vaccination site nga mao ang gym diha sa Cebu City Sports Center, Ayala Center Cebu ug Robinson’s Cybergate.

Kabahin sa manpower, si Ibones nagkanayon nga nakig-alayon sila nagkalain-laing medical schools ug mga tambalanan aron matabangan ang siyudad sa national vaccination days.

Samtang sa Dakbayan sa Talisay, mobakuna batok COVID-19 ang Dakbayan sa Talisay sa adlaw nga Sabado karong semanaha kabahin kini sa pagpahigayon sa laing hugna sa national vaccination days.

Si Dr. Lino Alanzado, pangulo sa City Health Office nagkanayon nga nangandam na sila niini.

Gibutyag ni Alanzado nga nibalik na sila sa pagpamakuna sa 5 ngadto sa 11-anyos diin nihatag sila og second ug first dose sa mga bata.

Ang siyudad nakadawat kini og 5,000 ka doses sa bakuna gikan sa Department of Health.

Subay niini, nabalik na ang bakuna nga J&J diha sa tanang vaccination sites sa siyudad.

Kini maoy gipahibawo ni Mayor Gerald Anthony “Samsam” Gullas Jr..

Ang bakuna nga J&J itagana kini alang sa senior citizens, Person With Disability, mabdos ug adunay gipamati sa lawas.

Ang pagbakuna sa 5 ngadto sa 11-anyos ang nagpadayon diha sa Talisay City College.

Samtang gihangop sa sa Talisay City Health Office ang tanang mga vaccinators gumikan sa dako nila nga tabang alang sa pagbangon gikan sa pandemiya.

Si Dr. Lino Alanzado, nipahalipay sa vaccinators nga mga babaye atol sa International Women’s Day. —Gabriel C. Bonjoc/BDB (BANATNEWS)