Pamakuna sa 5 ngadto sa 11-anyos nibalika na
CEBU, Philippines — Hingpit na nga gigamit sa Cebu City Government ang vaccination site diha sa Robinson’s Cybergate alang sa 5 ngadto sa 11-anyos diin una kining gigamit isip vaccination site alang sa 12 ngadto sa 17-anyos nga mga bata.
Si Dr. Jeffrey Ibones, officer-in- charge sa Cebu City Health Department nagkanayon nga ilaha kining gi-convert nga vaccination sa 5 ngadto sa 11-anyos nga bata tungod kay duol kini og tambalanan.
Apan dili usab angay mabalaka ang 12 ngadto sa 17-anyos nga mga bata tungod kay ablihan naman usab nila ang NOAH ug Robinson’s Galleria, SM Seaside City Cebu, SM City Cebu ingon man ang UC Banilad modawat na usab og bata nga 12 ngadto sa 17- anyos.
Tulo na ang vaccination site sa 5 ngadto sa 11-anyos nga mga bata diin ang laing duha mao ang gym diha sa Cebu City Sports Center ug Ayala Center Cebu.
Nasayran nga niadtong nilabay’ng Sabado nibalik sa pagpamakuna ang Cebu City Government sa 5 ngadto sa 11-anyos nga mga bata human nga niadtong Biyernes nakadawat sila og 4,000 doses ka supply sa bakuna alang sa maong age bracket gikan sa Department of Health-7 ug Visayas Vaccination Operation Center.
Sa laing bahin, nibalik na ang pagbakuna alang sa 5 ngadto sa 11-anyos sa Dakbayan sa Naga.
Nagsugod ang ilang bakuna kagahapon sa buntag diha sa ECAC vaccination center alang ngadto sa magpa-fistst does ug second dose nga kabataan.
Giawhag ni Mayor Kristine Vannesa Chiong ang mga ginikanan sa pagpabakuna sa ilang mga anak aron maprotektahan batok sa virus.
Samtang sa Dakbayan sa Talisay nIbalik na usab ang ilang pagbakuna alang sa maong age bracket apan alang lang sa second dose ang ilang mahatag.
Matud ni Mayor Gerald Anthony “Samsam” Gullas Jr. nga wala pa maabot ang bakuna sa mga bata alang sa magpa-first dose.
Diha gihapon sa Talisay City College ipahigayon ang pagbakuna. Gabriel C. Bonjoc/BDB (BANATNEWS)
- Latest
