CEBU, Philippines — Gipahibalo ni Konsehal Phillip Zafra nga walay puas ang Kagamhanan sa Siyudad sa Sugbo alang sa pagpasiga og balik sa mga poste sa suga ilabi na diha sa mga bukirang barangay.
Suma pa Zafra nga duna sila'y lapad nga koordinasyon sa Visayan Electric aron ubay-ubay na sa mga poste ang mapasigaan og balik human naapektohan og maayo bagyong Odette.
"Naningkamot ang city government ug VECO nga mapasigaan dayon,kay nasayod kita kun unsa ka importante sa mga poste sa atoang dapit nga maoy maghatag og kahayag sa atong kadalanan," matud pa ni Zafra.
Matud pa ni Zafra nga sa maong pamaagi, dili na kuyaw ang kadalanan, kung hayag na ang usa ka dapit, dili na makuyawan moagi ang mga tawo.
Kaabag ni Zafra sa maong kampanya mao ang Department of Public Services (DPS) ug Bise Mayor Donaldo Hontiveros ug ubay-ubay na matud pa ang ilang naserbisyohan.
Gawas sa maong programa gihingosgan usab sa siyudad ang electrification project ilabi na sa mga lagyo nga lugar. Matud pa nga duna gihapoy mga lugar ilabi na sa kabukiran ang wala pa gyud naabtan og linya sa kuryente. Nagkanayon ang konsehal nga padayong naningkamot ang kagamhanan aron masudlan og linya sa kuryente ang maong mga dapit. —MEL (BANATNEWS)