Niuwang sa away napusilan diha sa Talisay

CEBU, Philippines — Napusilan ang usa ka 32 anyos nga lalaki human siya niuwang sa sumbagay didto sa sitio Iba, Barangay Candulawan, Dakbayan sa Talisay niadtong Lunes sa gabii.

Ang biktima nailhan nga si Baldo Ramos, ulitawo, usa ka construction worker nga taga San Fernando.

Ang duha ka suspetsado nahibaw-an na apan nihangyo ang kapulisan sa pagpugong lang una sa ilang mga pangalan samtang padayon ang hot pursuit operation.

Si Police Corporal Eleazar Belciña sa Talisay City Police Station nagkanayon nga usa ka Marwin Resurrection ang nitug-an nga sa wa pa mahitabo ang pagpamusil adunay nahitabong sinukmagay.

Ang sinukmagay nahitabo tali sa mga kauban sa biktima nga construction worker ug mga estambay sa lugar.

Padung nga mosulod sa ilang construction site ang mga trabahante sa dihang gikwestiyon sa mga suspek ang ilang pag agi.

Nilaban ang usa ka suspek ug didto nasab niuwang ang biktima.

Nibunot og armas ang usa sa mga suspek dayon pusil ug naigo ang biktima sa ubos nga bahin sa iyang lawas ug padayon pang nagpa alim sa tambalanan.

Samtang ang mga suspek nisibat dayon human sa hitabo. —MEL (BANATNEWS)