Mayor Chan tinguha nga ikondinar ang rapper nga si EZ Mil

CEBU, Philippines — Dili na ideklarar nga persona non grata hinoon girekomendar ni Lapu-Lapu City Mayor Junard Ahong Chan ngadto sa konseho sa siyudad nga mopalabang og resolusyon nga magkondenar sa rapper nga si EZ Mil sa pagmugna niini og kanta nga giulohan og "Panalo".  

Sa iyang Facebook post gikondinar sa mayor ang lyrics sa maong kanta ilabi na sa usa ka linya nga nag-ingon "Nanalo na ako nung una pa na pinugutan si Lapu sa Mactan."                                     

Giawhag usab ni Chan ang rapper sa pag-usab sa lyrics o sa kanta nga naghulagway sa national hero nga si Datu Lapu-Lapu.                                      

Gipangayo usab niini nga mangayo og public apology ang maong rapper ngadto sa mga Oponganon.                              

"Mao nga isip amahan sa dakbayan, nasakitan ko sa pagbiaybiay nga gibuhat. Kung wala giila ni Ez Mil nga bayani si Datu Lapu-Lapu dili na lang unta siya maghimo og kanta nga makamugna og kalagot ug kasuko sa matag Oponganon," suma pa ni Chan.                         

Matud pa niya nga bisan mismo ang Presidente sa nasud mihatag og pasidungog kang Datu Lapu-lapu pinaagi sa pag-highlight sa ika-500 nga kasumaran sa Kadaugan sa Mactan karong umaabot Abril 27, 2021. —MEL (BANATNEWS)