CEBU, Philippines — Kagahapon ang kataposang adlaw sa dunol nga gipahigayon sa kagamhanan sa Dakbayan sa Sugbo ug Cebu City Jail alang sa mga Persons Deprived of Liberty diha sa nahisgutang pasilidad.
Nasayran nga ang dunol gihimo kini aron sa paghatag og higayon sa pamilya sa mga PDL nga mahatag ang regalo, pagkaon ug mga importanteng gamit sa ilang minahal sa kanibuhi nga nabilanggo.
Sulod sa tulo ka adlaw ang gihatag nga higayon sa siyudad ug CCJ alang sa maong katuyoan diin ang dunol diha gipahigayon sa Fuente Osmeña Circle.
Subay niini, si Cebu City Councilor Dave Tumulak nagkanayon nga malamposon ang gipahigayon nga dunol.
"So far wala tay nakita nga mga problema kay ang pamilya usab sa mga PDL mikooperar man pod, nakita man sad nato nga naa gyuy social distancing, nagsul-ob sab sila og facemask ug ingon man faces shield", matud ni Tumulak.
Gipasabot ni Tumulak nga adunay gamay’ng pagkalangay gumikan kay hilingon sa nga personnel sa Bureau of Jail Management and Penology (BJMP) ang tanang mga regalo nga ihatag gikan sa pamilya sa mga PDL sa dili pa kini ipasulod sa Cebu City Jail.
Nagpasalamat si Tumulak sa BJMP ug ni Cebu City Mayor Edgardo Labella ug sa tanang volunteers tungod kay nagmalamposon ang dunol alang sa mga PDL. —BDB (BANATNEWS)