Hinabang sa senior citizens ug PWDs sa Talisay ipanghatag na

CEBU, Philippines — Ang mga senior citizen ug Person With Disability (PWD) sa Dakbayan sa Talisay gikatakdang makadawat ugma sa ilang hinabang gikan sa kagamhanan sa siyudad.

Si Emma Macuto, city treasurer sa siyudad nagkanayon nga ilaha nang i-withdraw karong adlawa ang kwarta alang sa hinabang sa mga senior citizen ug PWD.

Matud ni Macuto nga P20 milyones ang pundong gitagana alang sa hinabang sa mga senior citizen samtang P3.5 milyones ang gigahin nga pundo alang sa hinabang sa mga PWD.

Matud usab ni Macuto nga ang nahisgutang kwarta ilaha dayon kining ihatag ngadto sa kabarangayan aron sila na ang mag-apod-apod niini ngadto sa beneficiaries.

Tinguha unta nila nga ipanghatag kini sa sunod tuig apan si Mayor Gerald Anthony “Samsam” Gullas Jr. nidesisyon nga kinahanglang mahatag kini sa dili pa matapos ang tuig.

Ang siyudad aduna kini 13,000 ka senior citizens ug 2,500 ka PWD diin matag usa kanila makadawat og P1,500. — BDB (BANATNEWS)