P1 milyones gitanyag nga ganti sa makatug-an sa killer–Chan

CEBU, Philippines — Mohatag og P1 milyon nga kwartang ganti si Mayor Junard "Ahong" Chan sa Dakbayan sa Lapulapu sa tawong makatumbok kun kinsa ang nagpatay kang Konsehal Zandro "Sanny" Augusto sa Barangay Mactan niadtong Sabado sa gabii. Sabado  sa gabii Septiyembre 19  ang kalit lang gipusil patay  sa riding in tandem si Augusto.

Matud pa ni Chan, mao kini ang labing unang linuog nga panghitabo sa iyang administrasyon nga pagpatay sa usa ka barangay konsehal.

Sumala pa ni Chan, dili nila makalimtan ang kakugi ug sakripisyo ni Augusto ilabi na panahon sa pandemiya tungod kay mas gihimo niini ang ginbuhaton sa mga frontliners.

Hugtanon niya nga gikondinar ang maong pagpatay ug misaad siya nga buhaton sa siyudad ang tanan aron makab-ot ang hustisya para sa konsehal ug sa iyang banay.

Buot ni Chan nga masikop  ug mataral sa hukmanan ug magbayad sa krimen ang naghimo niini.

Ug aron maagni ang publiko pagtabang, si Chan mitanyag og usa ka milyon ka pesos nga reward money sa mga tawo nga makatudlo kun kinsa ang nihimo sa maong krimen.

"Palihug ko sa pagtxt o pagtawag niining mga numeroha 09989673794 or +639393711288. Daghang salamat," dugang pa ni Chan sa iyang post sa Facebook. Romeo Limpangog/IBM (BANATNEWS)