Mga simbahan buksan na og balik

CEBU, Philippines — Gikatakda karong adlawa ang pagbukas og balik sa mga simbahan ilabi na ang anaa sa Dakbayan sa Sugbo.

Sayo pa, ang mga simbahan gisiradohan kini dihang gipaubos sa enhanced community quarantine ug modified enhanced community quarantine ang siyudad.

Matud ni Father Japhet Geonzon, parochial vicar sa Cebu Metropolitan Cathedral ug vice chairman sa Archdiocesan Commission on Worship nga karong adlawa mosugod na ang ilang unang misa sa alas 5:00 sa hapon hangtud sa alas 7:00 sa gabii apan 10 porsiyento lang sa seating capacity ang tugotang makasulod sa simbahan.

Si Dave Deriada, presidente sa Parish Pastoral Council sa Cebu Metropolitan Cathedral nagkanayon nga 300 ka tawo lang ang makatambong sa mga misa sulod sa simbahan sa taas nga bahin ug sa gawas base sa seating capacity nga sundon subay sa health standard ubos sa general community quarantine.

Ang sulod sa simbahan aduna kini 1,500 ka seating capacity.

Matud ni Deriada nga estrikto nilang ipatuman ang tanang health protocols.

 Duha ka entrance ang ilang ipatuman diha habig sa P. Burgos ug Legazpi samtang usa ka exit diha sa dako nga gate habig usab sa P. Burgos.

Ang dili magsul-ob og face mask, walay quarantine pass, mga menor de edad ug senior citizens dili tugotang makasulod sa simbahan.

Ang Cathedral mopatuman usab og one entrance ug one exit policy sa gustong modagkot.

Ang kaparian niawhag kini sa katawhan nga mosunod sa tanang health protocols nga gipatuman sa simbahan.

Samtang ang Basilica Minore Del Santo Niño mobalik na usab kini og pahigayon og misa diha sa pilgrim center ug dili usab tugotang makasulod ang walay quarantine pass.

Ug 350 lang ka tawo ang gitugotan nga makasulod sa matag misa sa basilica ug kinahanglan motuman sa mga health protocol. /BDB (BANATNEWS)