Sam-ang ugmaron sa bukid

CEBU, Philippines — Gitug-an ni Cebu City Mayor Edgardo Labella ang tinguha sa kagamhanan nga mohimo og sam-ang sa bukiran nga barangay human nagkataas ang ihap sa mga nangamatay.

Matud ni Labella nga nakig-alayon na sila karon sa Archdiocese of Cebu kinsa adunay duha ka dagku nga sam-ang nga mao ang Calamba Public Cemetery ug Carreta Cemetery.

Sumala pa sa mayor nga nagkadaghan ang gilubong maong nagkuwang na sab ang kabutangan hinungdan nga iyang gipirmahan ang tinguha nga magbaton og kaugalingon nga sam-ang ang siyudad.

Matud ni Labella nga ang sam-ang himoon sa usa sa mga bukiran nga barangay sa siyudad diin maka-akomodar kini dili lang may labot sa COVID-19 apan lakip usab kini sa uban pa nga mangamatay.

Si Konsehal Dave Tumulak una na nga niduso og resolusyon nga nag-awhag sa lokal nga pangagamhanan nga magbaton og kaugalingon nga sam-ang human nagkataas ang kaso sa mga nakalas tungod sa COVID-19 ug uban pa. /GMR (BANATNEWS)