Lagda sa social amelioration libog pa

CEBU, Philippines — Giawhag sa mga kongresista ug mayor sa Lalawigan sa Sugbo ang Department of Social Welfare and Development nga iklaro ngadto sa publiko ang kalabot sa social amelioration sa apektado sa coronavirus disease (COVID-19).

Si Talisay City Mayor Gerard Anthony “Samsam” Gullas kinsa usa sa nihangyo nga makigtigum uban ang mga opisyal sa DSWD ug si Gob. Gwendolyn Garcia nagkanayon nga nangita na ang mga tawo kung asa na ang maong hinbang.

Ubos sa Social Amelioration Program (SAP) sa DSWD, mahatagan og cash aid ang mga vulnerable sectors nga naapektuhan sa coronavirus pandemic.

Giilang beneficiaries ang mga persons with disabilities, senior citizen, mabdos, ug mga nawad-an og trabaho tungod sa epekto sa COVID-19 ug uban kinsa makadawat og P5,000 hangtud P8,000.

Si Gullas nagkanayon nga angay nga “transparent” ang DSWD sa guidelines ilabi na kung kinsa gyud ang moapod-apod niini ug kinsa ang kwalipikado nga makadawat.

Si Liloan Mayor Christina Frasco gusto usab nga klarohon sa DSWD kun asa ang kwarta gumikan kay ang mga tawo nagtuo nga anaa kanila.

Si Gullas nagkanayon nga Abril 1 ug 2 pa nahatagan og guidelines ang mga lungsod sa ug siyudad kalabot sa SAP apan kagahapon, Abril 3, ang gitakda nga pagpaduso sa lista.

Si Garcia nagkanayon nga angay nga ang DSWD aduna nay consolidated nga listahan sa mga vulnerable sectors nga qualified beneficiaries sa SAP sama sa senior citizens ug PWDs sanglit aduna nay daan opisyal nga lista ang maong ahensya.

Ang kuwang sa lista nga qualified beneficiaries mahimo nga ang lokal nga kagamhanan na ang molista

Si Gullas nagkanayon nga maglisud ang mga LGUs sa paglista kun wala mosulti ang DSWD kun kinsa ang naa na daan sa lista sa ahensya.

Si Naga City Mayor Kristine Vanessa Chiong gusto sab nga maklaro kung pananglitan sa usa ka pamilya adunay usa ka PWD ug usa ka senior citizen kung pareho ba kining makadawat.

Si Kongresista Vincent Franco “Duke” Frasco ug Deputy Speaker Pablo John Garcia nipadayag sab og susamang concern ngadto sa DSWD.

Ang representante sa DSWD nagkanayon nga ang pundo anaa pa sa ilang buhatan apan ang klarong guidelines sa pagluwat niini mananghid pa ang regional office sa central office kun mamahimo sila nga mopagawas og press statement sa media kalabot niini aron maklaro ang concerns sa kadaghanan. /GMR (BANATNEWS)